Wat Kaal Vam Ebbe Mejnt

Wann iëck sou dürch dei Staulriggen goh,
dann wejt iëck, nu sit se alle wier do.
Wo fingeste dat noch ejnmol sou wier,
keiner es met derm andern im Strie,
jejder süht blous bim andern dat Beste,
ouk dat hört taum Meinezer Schützenfeste;
un iëck seih unserm Küinig siene Ougen blinken,
do loffe uns ruhig ejnen drop drinken. –
Proust!

Iëck meine, diern muargen wult vie dat nit vergiarten:
Küenig es me nit blous mem Koppe, –
vür allem mem Hiarten!
Un diert hie, iëck stelle mie dat grade sou für,
betalt hei over leiwer as dei Gewerbestüer.
Hie wejt noch alles akerot verdejlt,
me süll nit meinen, dat dat dirndach noch gejht,
bie keinem rejket dei Am etwas länger –
vam Bürgermester büs taum Schliekefänger.

Dei Schützen ower sult eren Küinig fiern,
hie hert dei „Olle Tied“ noch en Wot te sien.
Met derm letzten Schüert siener Munitioun
bung hei en schön Stücke an dei Traditioun.
Wual dern, dei siak an güstern besinnen kunt
un af un tau dann noch wierten, wou dei Weige stund.
Wei well noch dirndach ’ne gelappete Butze driarn,
süs du noch en Kaudriet op de Strote lien?
Wei wejt noch, wie et es, wan de Wolbern seukest
un et Ovens en Kuarf voll fürn Schwatbrout verköüpest?
Wou guat hert frögger dei Misthoupen estunken, –
wei siert noch hei her Melke van de Hippe edrunken?
Es hie noch en Schaulmester, dei de Blagen verkloppet?
Un ejner, dei siene Pipe ut ’ner Schwiensblose stoppet?
Iëck hörte noch es wier sou jäne en billigen Jakop raupen
un bejt noch es wier jene in en Hawermerlskauken.
Frögger han se en Rieserbesmen für de Husdür stohn,
do wusse jejder, hie brükeste nit rin te gohn.
Wie ne Burg mauste dierndach dien Hus verrammeln,
süs herste keine Juppe mej am Haken bammeln.

Sou es nu dei Tied, sei es termlik frech,
was do nit pässet, dat maut ejnfach wech.
Bim Hedfelds Ötte fürm Huse wurn dei Böüme eschlohn,
domet muche en schöün Stücke van Meinerzen gohn,
wouviel dat woren, dat wejt kum noch ejner,
do häffe nu Platz fürn paar kleine Italiener.

Un noch ejnte, dorüwer sit wie uns im kloren,
hie soten alt unsere Ollen für vielen Johren
und küerten wie vie dat kantige Platt,
sou härt sou mancher es ne Hejmat ehat.
Un sei dröümet noch fake van dern hejmischen Dingen;
bie uns over sult sei se wierfingen.
Sei gehört hie dobie, - nit blous as Gäste,
ouk dat hört taum Meinezer Schützenfeste!

At iëck güstern muargen sou vam Ebbe raf kom,
do blejv iëck es bim *Pollmann an der Ecke stohn,
wat was da nit alles sou schöün dekorejert,
dei Schützenlüh han siak met witten Stulpen postejert,
fif Mann harn im Park dern Rasen estutzet,
dat Amte was ouk es van buten eputzet,
me soch nit mej ejnen Schnibbel im Grawen liehen;
dei Gemeinderot har siak dei Hore eschnien,
dei Stroten sogen ut, at wärn se polejert,
et hung ouk wier ne Fahne buten fürm *Wejert;
un wecke mejnte, hei gehörte unbedingt dobie,
dei stund ouk nu wier an der richtigen Stie;
Met ejnem Wot, alles was wier in `n Elementen –
iëck gloffe, nu küemet noch ejmol en Präsedenten. –

Wat har mie dat domols lej edohn,
iëck soget in der Tiedung stohn:
No Meinerzen was `n Präsedenten  ekuamen,
iëck här `ne mie äs jäne unger de Ougen enuamen.
Taum Schützenfeste, dache iëck, wör hei wierkommen,
un her siak en paar Dage frie enuamen.
Et was nu am Platze, dat kunn hei ruhig wierten,
taufällig har keiner dei Stroten operieten.
Wat süht dat dumm ut, wamme ümme jejden Driet
dei Graven noch ejnmol wier uopen schmitt.
Un alles här soun festlichen Klang,
dat wör gewiss kein schlechter Empfang.
Hei künn jo ouk in de ejesten Rigge gohn,
dann her hei se es ejnmol alle hinger siak stohn.
Dat wejst du ouk, bim Wacholder un Bejr,
do verstejht me siak biater, manchmol ouk ejher.
Iëck här noch de Backe voll met me te küren,
hie üwer sou manches ouk üwer dei Stüern.

Wann me sou ruter in nen Osten gejht,
un koert echterm *Lüsebrink seinem Versandhuse stejht,
do, wou man dern Eiken `n Paar Stiewel antüht,
ut Beton emüert, was me selten süht,
dann liert do ne Stejnwüste rechter Hand,
dat es soun biëtchen mem Mound verwandt.
Iëck sache dierse Dage noch tau mienen Blagen:
Dat es dat „Kap Känäverel“ van Meinerzhagen.
Fake häve iëck drane rümme studejert,
iëck hote, hie würn dei Bagger utprobejeiert.
Wann de meinst, dei Driete läche an de richtigen Stie,
dann küemet ejner un verschüwet se wier.
Dat sall ower, sou höte me van ejnigen Hären,
ejnes Dages doch noch en Stadion wären.
Iëck meine, me süll do ouk bolle für suargen,
iëck trap dern *Hüsners Adolf diern muargen:
Hie leip hei noch jäne dei „1000-Mejter-Bahn“;
mej as 10 Jahre over süll me nit warn.
Noch heve `n paar Sportler, dei stott noch wie Böüme,
besüh dern ollen *Reips, dern Welter 
un ouk en *Schulten Öümen.
Hie sall me dat ruhig es ejnmol siehen,
do kann sierk manchejner ne Schiewe van schnien.
Met der Mule krit sou Vierle en Lorbeer ebungen,
dei häve iëck over noch nü op’n Sportplatz efungen. –
Un ejnes Dages, dat es sou sieker wie wat,
dann wejt ut derm Stadion ne Rennbahn emat.
Dat bränget dermnächst unsre Tied sou met,
wann alle Blagen es `n Auto het.
Taum Jagen es dat Meinerzen dann vierl te klein,
dat sall dann hie op der Rennbahn gescheihn,
do maut jejder wierten, wat hei deut,
un keiner siert mej: Dei es nit gescheut.

Un noch wat her iëck jäne derm Präsidenten esacht,
do hätt ouk dei Rotshärn noch nü anedacht:
Wat sall dat, wan me dei Lü taum Sparen anhölt,
un dann en „Halteverbot“ für dei Spakasse stellt.
Do kann dei *Erhard noch so schängen,
wei well do noch en Groschen no der Kasse brängen.
Dei *Ulrich meinte nu: Guat Luav un Dank
sou gejt et taum Glücke ouk der Dütschen Bank.
Nü süh no der andern Siete, wat do passejert,
in der Dränke, bim *Vogelsang, *Killing und *Wejert,
do kannste hollen, wann de wus,
fake mem ganzen Omnibus.
Un kontrollejert hie es ejner sienen Kontostand,
dann herst de et Wirtschaftswunder ut ejrster Hand.

Sou, un wann du nu dienen bloen Kiel uttüst,
un in Gedanken noch ejnmol dern Schützenzug sühst,
met dern bunten Blaumen un derm Küinigswagen,
met Raketen, dei houge üwer dei Hüser jagen,
wann et die dann en bietchen wame ümmet Hiarte wejt,
sou glöv men, dat es die nit allejne sou gejht;
dat Fest gejht tau Enge, diert es noch dei Rest,
vam schöünen Meinezer Schützenfest!